UDINE IN LUCE

Apene che si podeve sbrissâ-fûr, vie di corse al ‘zardinut Ricasoli. Lì e’ vignivin, si po’ dî, duc’ i fruz dal borc di Aquilèe, di vie de Pueste, di Plazze, di vie Cavour, di Marcjâtvieri. Insumis e’ jerin duc’ dal “centro”, duc’ fîs di buine famèe, nuje ce dî… Qualchi volte, po, e’ rivavin ancje chêi di borc Puscùel e di borc dai Roncs; e fintramai chêi dal borc di Glemone. Alore po ‘o comenzavin a ticâsi e a remenâsi e squasi simpri par vie dal borc. E o’ finivin cun tune pestade, cussì che la sere si tornave a cjase cu la cjamese sbregade e cun qualchi bernòcul tal zarneli.
Ma, bisugne ricognossi, quan’ch’o jerin di bessôi, senze chê gjarnàzzie, nô ‘o jerin mancul scalmanâz. Di solit si stave al Ricasoli, a ‘zujâ di “bandiere” o di “dame e cavalîr”, cu lis frutis ben vistudis e petenadis a puntin. La prime cuete, no covente dîlu, la vin cjapade propit lì. Duc’.